Kơdră chĕp pơgơ̆r Teh đak Võ Văn Thưởng pơma tơbăt jơhngơ̆m đon chơt hơ iă ‘măng mă blŭng năm tơmang Hơnih tơm Vienna, plei nuih kơ teh đak Áo, hơnih tơm oei sa joh ayŏ kơ châu Âu, hơnih vei răk tơƀăk mong dôm tơdrong oei sa joh ayŏ gĭt kăl kơ châu Âu păng lơ sơnăm hơnơ̆ng đei rơ̆ih jing pơlei tơm kăl hơrih sa hloh lơm apŭng plĕnh teh. Kơdră chĕp pơgơ̆r Pơlei tơm Vienna tơmăt jơhngơ̆m đon chơt hơ iă đei sơng Kơdră chĕp pơgơ̆r Teh đak Võ Văn Thưởng, Akăn ƀok hăm Khul kơdră tang măt Việt Nam năm ngôi tơ̆ teh đak Áo păng Hơnih tơm Vienna.

Kơdră chĕp pơgơ̆r pơlei tơm Vienna tơbăt hăm Kơdră chĕp pơgơ̆r Teh đak găh tơdrong jang mŭk drăm-tơpôl kơ pơlei tơm Vienna. Kơdră chĕp pơgơ̆r pơlei tơm Vienna hlôi tơbăt hơdăh rim ‘măng Hop akŏm khoa hŏk găh Kơdră chĕp pơgơ̆r Teh đak Hồ Chí Minh, tơdrong jang hơdoi kơjăp ƀar păh Hơnih tơm Vienna păng Hơnih tơm Hà Nội, tơbăt dơ̆ng ‘măng năm tơmang teh đak Áo đơ̆ng Kơdră kơpal Việt Nam. Lơ̆m khei ‘năr tơbăt tơgoăl Việt Nam-Áo tŏk bŏk atŏk tơ iung ‘lơ̆ng liĕm, pơlei tơm Vienna ‘meh vă atŏk kơtang tơgoăt jang hơdoi hăm rim tơring Việt Nam, mă kăl găh mơdro sa, tơmang pơhiơ̆, kon pơlei năm ngôi dih băl, vang pơgơ̆r jŏh ayŏ kơdŏ soang ăn dih băl.