Jơ tơƀơ̆p muh măt đei pơgơ̆r vă lăng truh jơ ‘năr tơbăt 20 sơnăm pơjing pơlei tơm găh lơ̆m Trung ương (01/01/2004 – 01/01/2024). Rim bơngai jang ‘lơ̆ng, gơh hơgei đei pôk pơ ư, hôn bơnê ‘măng mă au ‘noh dôm bơngai bơ̆ jang ‘lơ̆ng hloh đei rơ̆ih iŏk đơ̆ng rim tơring truh tơ̆ pơlei tơm, tang măt ăn đĭ đăng hơnih jang, tơdrong jang păng rim răih khul kon pơlei; đei tơgop tih tên ăn atŏk tơ iung mŭk drăm - tơpôl pơlei tơm Cần Thơ rim jăl jang.

Kơdră chĕp pơgơ̆r teh đak Võ Văn Thưởng pơkă, lơ̆m khei năr atŏk tơ iung, Cần Thơ kăl hơnơ̆ng lăng kon pơlei ‘noh tơm hloh. Hơnih Đảng, Kơdră tơring kăl jang kiơ̆ tơklep kơjăp, xek tơlang rim tơdrong tơnap tap, tơhlăk tơhlĭn, dôm tơdrong mă kon pơlei tơtok tơtăm. Kơ yuơ “trong tơlĕch jang kơ taŏk tơ iung ‘nŏh kăl hơnhăk ba đei tơdrong chơt hơ iă ‘nă hal ăn kon pơlei”. Atŭm hăm ‘noh atŏk kơtang hlŏh dơ̆ng rim tơdrong jang pơting dih băl ‘mêm kơ eng teh đak, vă đơ̆ng noh pơjing đei dơ̆ng lơ bơngai jang ‘lơ̆ng, gơ̆h hơgei vang iung jang kiơ̆ roi năr roi kơtang, tơgop lơ hloh dơ̆ng păng gĭt kăl hloh dơ̆ng ăn tơdrong atŏk tơ iung kơ pơlei tơm lơ̆m khei năr au kơnh.