Kơsơ̆ năr 19/7, tơ̆ Hơnih bơ̆ jang vei lăng kon pơlei apŭng Côn Đảo, Kơdră chĕp pơgơ̆r Teh đak Võ Văn Thưởng tơƀơ̆p muh măt kơdră tang măt Hơnih chĕp pơgơ̆r krao tơchă kang ƀô̆ ƀô̆ đô̆i kĕch mang Việt Nam răm ayăt rôp, chĭt kron păng 76 ‘nu pơnă chinh trĭ Côn Đảo tang măt ăn hloh 5.000 ‘nu kang ƀô̆, ƀô̆ đô̆i kĕch mang răm ayăt rôp phak, vă apĭnh jet gia pơma dơnuh, hơlêm păng hôn bơnê dôm tơdrong tơgop, plang akau ăn rim jơhnơr ƀô̆ đô̆i kĕch mang, rim ƀô̆ đô̆i nuih mơng lôch dŏng teh đak păng kon pơlei ‘mêm kơ eng teh đak, kơ yuơ bơ̆ jang pơm rơngei ăn hơdrĕch hơdrung.

Tơ̆ jơ tơƀơ̆p mŭh măt, rim kơdră tang măt hlôi pơma dơnuh tơroi dih băl dơ̆ng mĭnh khei ‘năr mơmat tat mă lei nuih mơng đơ̆ng rim kang ƀô̆ ƀô̆ đô̆i kĕch mang mĭnh nơ̆r ƀơ̆r đon, mă đơ̆ng ayăt teh dong tôch dang yơ, pơm ăn pham lĕch sĕch huŏng, mă lei ling lang vei kơjăp jơhngơ̆m đon kĕch mang nuih mơng. Đơ̆ng rŏng lơ sơnăm vih năm ngôi dơ̆ng tơ̆ Côn Đảo, lơ pơnă chinh trĭ tơbăt jơhnbgơ̆m đon chơt hơ iă ƀôh hơdăh tơdrong tơplih kơtang kơ tơring mă sơ̆ đei lăng jing “Hơnih lôch răm cham char”, hơnih mă rim tơmo, sơdrai ‘long, tơ-‘mơ̆ng ‘ngiĕt ƀrông ƀrang pham lĕch sĕch huŏng kơ rim ƀô̆ đô̆i kĕch mang nuih mơng. Iung pơma tơ̆ jơ tơƀơ̆p, Kơdră chĕp pơgơ̆r Teh đak Võ Văn Thưởng hlôi pơtruh nơ̆r ƀơ̆r pơma apĭnh jet gia păng hôn bơnê truh rim pơnă chinh trĭ Côn Đảo sơ̆; tơbăt lơ̆m dôm sơnăm au ki, Đảng, Teh đak hơnơ̆ng lăng ba hăm hloh 9 triu ‘nu bơngai đei iŏk yau ăn teh đak; hơnơ̆ng atŏk kơtang bơ̆ jang tơgŭm djru, mă kăl ‘nŏh tơchă kôch akŏm grong ƀŭ kơting ƀô̆ đô̆i lôch dŏng teh đak, ming hơmet pơsat teh đak, pơm hơmet ‘lơ̆ng rim lŏk pơsat, tơbăt jơhngơ̆m đon nhă đak chăm kơ tu.

Kơsơ̆ năr au mơ̆n, Kơdră chĕp pơgơ̆r Teh đak hlôi năm tơmang lăng Hơnih mong răk Mŭk drăm Côn Đảo păng Hơnih gru gra gĭt kăl dăr sơnăm Hnam pơnă Phú Hải.