Kơdră chĕp pơgơ̆r Teh đak Võ Văn Thưởng sơkơ̆t hơdăh trong jang tơm kơ Việt Nam ‘noh hơnơ̆ng lăng kơjăp atŏk tơ iung tơgoăt tơgoăl joăt joe păng jang hơdoi lơ tơdrong hăm rim teh đak Trung Á, lơ̆m au đei Uzbekistan, ‘meh vă tơgoăt tơgoăl Việt Nam - Uzbekistan atŏk tơ iung tơpă hloh, trŏ lăp hăm tơdrong đei iŏk yua kơ kon pơlei ƀar teh đak.

‘Moi kiơ̆ hôn bơnê kơtang tơdrong đei jang hơdoi, Kơdră chĕp pơgơ̆r Teh đak athei ƀar păh atŏk kơtang jang hơdoi mŭk drăm-mơdro sa tŏk bŏk ‘lơ̆ng hơ iă lơ̆m khei năr tơjê̆ au, adoi atŏk kơtang hloh dơ̆ng dôm tơdrong anai nhen pơtho pơhrăm, chă joh ayŏ dih băl, tơmang pơhiơ̆, kon pơlei năm ngôi dih băl, tơchĕng hơlen pơjing trong păr hơyoh tơgoăt rim hơnih truh kơ ƀar teh đak. Kơdră chĕp pơgơ̆r Teh đak Võ Văn Thưởng athei ƀar păh pơtrŭt kơtang ăn khul kơdră tơƀơp dih băl, vă atŏk kơtang yom kiơ̆ dih băl kơjăp chinh trĭ păng hlôh vao dih băl, pơ̆ih să jang hơdoi dih băl lơ̆m rim tơdrong ƀar păh đei.