Tơbăt 133 sơnăm năr rơneh Kơdră chĕp pơgơ̆r Teh đak Hồ Chí Minh, pơgê năr 19/5, tơ̆ Hnam joh hơri tơm Hà Nội, Dơnŏ anih tơm vei lăng Jŏh ayo kơdŏ soang-Đă ƀŏng lŏng tơplong kơdau păng Tơmang pơhiơ̆ pơgơ̆r Pơm lêh pôk ăn Tơmam hơpăh Hồ Chí Minh, Tơmam hơpăh Teh đak găh văn hŏk, Jŏh ayŏ kơdŏ soang.

Hăm bơ̆ jang tơnăp ‘lơ̆ng đơ̆ng Khul kơdră chĕp pơgơ̆r, mă kăl Khul chĕp pơgơ̆r Teh đak,  đei 27 tơdrong chih pơcheh athei pôk ăn “Tơmam hơpăh Hồ Chí Minh” păng 144 tơdrong pơcheh đei athei pôk ăn “Tơmam hơpăh Teh đak” găh văn hŏk, joh ayŏ kơdŏ soang đei tôm rơvơn pơtruh ăn Thủ tướng Teh đak hơlen pơtruh ăn Kơdră chĕp pơgơ̆r Teh đak pôk ăn “Tơmam hơpăh Hồ Chí Minh”, “Tơmam hơpăh teh đak” găh văn hŏk, jŏh ayŏ kơdŏ soang sơnăm 2022. ‘Măng pôk hơpăh au đei 16 ‘nu bơngai chih pơcheh, khul chih pơcheh đei pôk ăn “Tơmam hơpăh Hồ Chí Minh găh văn hŏk, jŏh ayŏ kơdŏ soang”. Iung pơma tơ̆ pơm lêh pôk hơpăh, Kơdră chĕp pơgơ̆r Teh đak Võ Văn Thưởng hôn bơnê, hmach bơnê ăn rim bơngai chih pơcheh, ŭnh hnam rim bơngai đei tơdrong pơcheh ‘lơ̆ng hơ iă đei pôk ăn Tơmam hơpăh Hồ Chí Minh, Tơmam hơpăh teh đak găh văn hŏk, jŏh ayŏ kơdŏ soang sơnăm 2022; hơnơ̆ng lui kiơ̆ kơjăp; gô chang rim tơdrong pơcheh văn hŏk jŏh ayŏ kơdŏ soang ‘nao trŏ lăp hăm tơdrong bơ̆ jang kĕch mang kơ Đảng păng Kon pơlei bơ̆n.