Hơdrol kơ noh, ah kơsơ̆ năr 6/5, Thủ tướng teh đak bơ̆n Phạm Minh Chính, juăt jang lơ̆m Ƀan ƀĭ thư Trương Thị Mai atŭm hăm đe kơdră kơpal kơ Đảng, Teh đak hlôi truh ‘măn kơvang pơkao, plang hlôt nhang ƀlŏk tơbăt, pôk bơnê kơ linh lôch tang tơ̆ Pơsat tơƀlŏk kơ Linh lôch tang A1 tơ̆ dêh char Điện Biên. Ƀok Tổng Bí thư Nguyễn Phú Trọng hlôi gơih kơvang pơkao vă pôk bơnê kơ linh lôch tang.

Kơvang pơkao kơ đe kơdră kơpal kơ Đảng, Teh đak păng khul kơpal trung ương chih hơdah “Ling lang ƀlŏk hơdơ̆r kơ đe linh lôch tang”, tơƀôh tơdrong hmach bơnê kăp gĭt đơ̆ng teh đak, đơ̆ng kon pơlei truh hăm đe linh nuih mơng ưh kơ ‘mêm sĕch pham po, plang dơh hơkâu po ăn tơdrong rơngei hiôk hian kơ teh đak. Adoi lơ̆m kơsơ̆ năr 6/5, tơ̆ Anih soi ƀlŏk kơ Linh lôch tang tơ̆ Kơdrăn tơblah Điện Biên Phủ, Khul kơpal tang măt ăn Quân ủy Trung ương, Anih tơm Khul linh kơyuơ Đại tướng Phan Văn Giang, Ƀô̆ trương Anih tơm Khul linh adoi truh plang hlôt nhang, ƀlŏk tơbăt kơ Linh lôch tang tơ̆ Điện Biên.