Tơ̆ jơ tơƀơ̆p, bơngai tăh hla ‘meh vă, hơmŏ Đảng păng Khul kơdră teh đak hơnơ̆ng đei trong jang trŏ lăp pơtrŭt kơtang tơdrong jang mŭk drăm atŏk tơ iung. Lơ̆m ou lăng ba kơjăp truh trong jang tơgŭm djru găh tơdrong jang, hnam oei tơpôl, rim tơdrong pơkăp joh ayŏ, đă ƀŏng lŏng tơplŏng kơdou, tơgŭm djru pơtho tơdrong jang, tơgŭm djru mưh kŏng nhân hiong tơdrong jang, pơdơ̆h pơgia kĭ pơkăp jang ... Bơngai tăh hla jei apĭnh athei kăl đei trong sek tơlang trŏ lăp hăm rim tơdrong năm ba ăn hiơ hiơ̆, klĕnh ưh kơ năm ba ăn kon jên ƀao hiêm hiong tơdrong jang, ƀao hiêm tơpôl ăn bơngai jang; hơtŏk lơ ƀiơ̆ kon jên tơgŭm djru hiong tơdrong jang rim khei, găh kon jên sa hơpăh hăm rim kang ƀô̆, bơngai jang lơ̆m rim hơnih bơ̆ jang pơgang kơ teh đak. Iung pơma tơ̆ jơ tơƀơ̆p, Kơdră Hơnih bơ̆ jang Nô̆i chinh Trung ương Phan Đình Trạc akhan, dôm nơ̆r tơgop đơ̆ng bơngai tăh hla ‘noh tôch trŏ lăp. Khul kơdră tang măt Kuô̆k hô̆i dêh char Lâm Đồng gô tơgoăt kŏm, chih akŏm păng tơroi tơbăt ăn rim hơnih bơ̆ jang Trung ương.