Iung pơma tơ̆ jơ bơ̆ jang, ƀok Nguyễn Xuân Thắng pơma hơdăh, Khánh Hoà đei groi teh gĭt kăl, mŭk drăm tôch gĭt kăl; jĭ dêh char đei apŭng achon dơsĭ Trường Sa; đei tơdrong rơvơn atŏk tơ iung; jĭ ‘măng jang năm tơ̆ đak dơsĭ, hơnih tŏk bŏk tơgoăt tơring Tây Nguyên hăm tơring Tơmăn Nam Trung bộ năm tơ̆ rim tơring tơrang lơ̆m teh đak păng apŭng plĕnh teh. Ƀok Nguyễn Xuân Thắng athei Khul kơdră Đảng, Kơdră chĕp pơgơ̆r tơring păng kon pơlei dêh char Khánh Hoà hơnơ̆ng iung jang ‘lơ̆ng jơhngơ̆m đon tơchăr, atŏk kơtang iung jang hơmet ming mŭk drăm; lơ̆m ou mŭk drăm đak dơsĭ ‘noh kăl hloh, tơmang pơhiơ̆ ‘noh hơnih jang mŭk drăm tơm, atŏk tơ iung kơtang rim hơnih dơnŏk duk, akŏm atŏk tơ iung pêng tơring kăl ‘noh tơring ving Vân Phong, pơlei tơm Nha Trang păng tơring ving Cam Ranh.