Sơng iŏk nơ̆r krao hơvơn đơ̆ng Ƀô̆ trương châu Âu păng Kơdră jang tơbôl Phalăng, yă Catherine Colonna Kơdră jang tơbôl Việt Nam Bùi Thanh Sơn năm tơmang teh đak Phalăng đơ̆ng năr 5-6/6/2023. Tơ̆ pơma dơnuh pơgê năr 5/6, Kơdră jang tơbôl Bùi Thanh Sơn xơkơ̆t hơdăh, Việt Nam ling lang lăng kơjăp tơdrong tơgoăt tơgoăl hăm Phalăng, teh đak gĭt kăl lơ̆m khul EU, teh đak jang hơdoi gĭt kăl kơ Việt Nam hăm tơgoăt kơjăp găh chăl sơnăm, oei sa jŏh ayŏ, kon bơngai.

Ƀok Bùi Thanh Sơn athei Khul kơdră Phalăng tơgŭm djru, pơtrŭt athei Kuô̆k hô̆i Phalăng hrôih kĭ Tơdrong tơchơ̆t Tơgŭm dŏng tơmơ̆t jên jang Việt Nam - EU (EVIPA), pơtrŭt athei Hơnih jang Châu Âu (EC) hrô̆ih sut hŭt kơtheh găn ga (IUU) đơ̆ng EC hăm tơmam drăm ka hơdang kơ Việt Nam. Ƀar ‘nu kơdră chă pơma dơnuh dih băl găh rim tơdrong lơ̆m tơring, apŭng plĕnh teh mă ƀar păh lăng truh, sơkơ̆t hơdăh hơnơ̆ng iung jang hơdoi kơjăp păng tơgŭm djru dih băl lơ̆m rim ‘măng pơgơ̆r, hop akŏm lơ pang, mă kăl ‘nŏh Liên hợp quốc păng pơtrŭt kơtang trong jang hơdoi gĭt kăl ASEAN - EU.