'Măng năm tơmang teh đak Việt Nam mă âu đơ̆ng Kơdră Jơnŭm jang teh đak Thụy Sĩ tơƀôh tơdrong lăng tơgĭt đơ̆ng Thụy Sĩ hăm Việt Nam. Thụy Sĩ hơpơi 'meh hơtŏk tơbôl jang hadoi kơ 2 teh đak, mă kăl noh găh tơdrong jang mŭk drăm, tĕch pơdro păng hơdrin vă kĭ pơkăp Tơchơ̆t Tĕch pơdro hiôk hian đơ̆ng Việt Nam păng Jơnŭm jang tĕch pơdro hiôk hian châu Âu (EFTA).

'Nâu adoi jing tơdrong jang tơbôl ngĭ viê̆n kăp gĭt pơtoi pơtruh khul kơdră kơpal kơ 2 teh đak năm tơmang dih băl đơ̆ng rŏng kơ pơrang jĭ COVID-19. Lơ̆m 'măng năm tơmang, đơ̆ng rŏng kơ lêh xơng, Kơdră Jơnŭm jang kơ teh đak Thụy Sĩ Martin Candinas pơma đam ƀok Kơdră Kuôk hô̆i Vương Đình Huệ, năm hmach kơ Ƀok Kơdră teh đak bơ̆n Võ Văn Thưởng păng pơma đam hăm Thủ tướng teh đak bơ̆n Phạm Minh Chính; bơ̆ jang hăm Ƀô̆ trương Anih tơm Kŏng thơng Nguyễn Hồng Diên.