Sơnăm 2024 păng lơ̆m 3 sơnăm blŭng tơlĕch jang Tơdrong tơchơ̆t Hop akŏm Đảng rim jăl, dêh char Bình Định hlôi akŏm tơlĕch jang kiơ̆ kơtang, hrơ̆p mĭnh ‘măng dôm trong jang hơtŏk tơiung mŭk drăm - tơpôl, vei sơđơ̆ng teh đak, pơjing khŭl jang chĭnh trĭ lơ̆m tơring păng hlôi iŏk đei lơ jơnei ‘lơ̆ng. Truh dang ei đei 16/22 tơdrong hơgăt kăl đơ̆ng jăl jang 2020 - 2025 jang đei păng yak hloh trong tơlĕch ăn. Akŏp tơmam tơring tŏk 7,6%, dơ̆ng mă 17/63 dêh char, pơlei tơm lơ̆m teh đak. Mŭk drăm jô̆ pơhlom iŏk đei hloh 117.000 ti hlak jên đồng,  dơ̆ng mă 5/14 lơ̆m tơring tŏk bŏk.... Iung pơma tơ̆ jơ bơ̆jang, Kơdră Kuôk hô̆i Vương Đình Huệ pơ ư dôm jơnei mă Bình Định hlôi iŏk đei tơgop hơnhăk mŭk drăm hơnơ̆ng tơiung ming păng jang tŏk, dơ̆ng lơ̆m grŭp dơ̆ng hơdrol kơ tơring.

Lơ̆m khei ‘năr tơ̆ hơnăp kơnh, dêh char Bình Định hơdrin jang đei truh sơnăm 2030 jing dêh char hơtŏk tơiung găh grŭp yak hơdrol tơring găh Tu tŏk păng tơ ter đak dơsĭ Tŏk bŏk; anih kơdrơ̆m tih kơ teh đak găh hơtŏk tơiung mŭk drăm đak dơsĭ; tơmang lăng tơm kơ teh đak. Kơdră Kuôk hô̆i athei dêh char Bình Định hơdrin  jang đang ‘lơ̆ng hloh dôm tơdrong hơgăt, hơnăp jang hlôi tơlĕch ăn; hơmĕng păng lui ngeh akhan, Đảng bộ, khŭl kơdră păng kon pơlei dêh char Bình Định gô hơnơ̆ng hơtŏk ‘lơ̆ng jơhngơ̆m đon pran kơtang “Tây Sơn”, hrôih bơ̆jang kiơ̆ ‘lơ̆ng đon hơ pơih ‘meh truh sơnăm 2030, Bình Định jing dêh char hơtŏk tơiung găh grŭp dơ̆ng hơdrol tơring găt tu tŏk bŏk păng tơter đak dơsĭ tŏk bŏk.

Lơ̆m ‘măng năm bơ̆jang âu, Kơdră Kuôk hô̆i Vương Đình Huệ hlôi krao hơvơn Kŏng ti tơm Hàng hải Việt Nam tơgŭm dêh char Bình Định măn 100 tŏ hnam ‘mêm mơnat hăm kơjă 5 ti hlak jên.