Pơma ah jơ pơm jang hăm dôm anih jang đơ̆ng rŏng kơ chă hơlen tơ̆ anih ming man, Kơdră Kuôk hô̆i Trần Thanh Mẫn ră hơdah, Cham gre păr apŭng plenh teh Long Thành jing tơdrong ming man kăp gĭt, đei Kơdră Đảng, Teh đak tơlĕch jang tơnăp. ‘Nâu jing tơdrong jang kăp gĭt hăm hơtŏk mŭk drăm – tơpôl, vei sơđơ̆ng tơpôl kơ dêh char Đồng Nai, Tơring jang mŭk drăm dơnơm gah pơbah păng kơ jơ̆p teh đak, kơchĕng gô asong pơhlom 200.000 tơdrong pơm jang.

Cham gre păr apŭng plenh teh Long Thành đei lăng jing minh lơ̆m dôm anih tơm chơ pơdŭ tơmam drăm păng chơ tơmoi ‘nao hơgei hloh tơ̆ tơring. Gah tơdrong man Cham gre păr Apŭng plenh teh Long Thành, truh dang ei, hlôi keh đang gah tơdrong phă ƀôm min, chôk tơmăn teh, man pơga; tŏk bŏk oei tơlĕch man Hnam pơm jang, trong gre păr tŏk jur, Jăl trong kơsô̆ 1 pơtoi hăm Jăl trong 51 păng 03 anih ming man kăl hloh. Dôm tơdrong pơkăp hlôi đei jơnei hloh kơ tơchơ̆t tơlĕch pơtêng hăm tơdrong chih măt pơm jang.