Kơdră Kuôk hô̆i Vương Đình Huệ bơnê kơ tơdrong đei jơnei đơ̆ng Jơnŭm jang vei lăng kon pơlei pơlei tơm Hà Nội, lơ̆m noh, Jơnŭm jang vei lăng kon pơlei pơlei tơm păng dôm jăl pơgơ̆r vang jang tơnăp lơ̆m tơdrong đei jơnei 'lơ̆ng rŏ kơ tơdrong pôk rơih Kuôk hô̆i jăl 15 păng tang măt ăn Jơnŭm jang vei lăng kon pơlei dôm jăl jang đơ̆ng xơnăm 2021-2026.

Anih hơdăh kơ jăl jang âu noh anih jang Đảng kơ Jơnŭm jang vei lăng kon pơlei, Anih juăt jang kơ Jơnŭm jang vei lăng kon pơlei pơlei tơm hlôi pơtruh hăm Anih juăt jang kơpal kơ pơlei tơm Hà Nội tơlĕch păng pơm kiơ̆ Tơdrong jang kơsô̆ 15 găh “Hơtŏk hơbĕch pơm jang, đei yua kơjăp tơdrong jang kơ Jơnŭm jang vei lăng kon pơlei dôm jăl jang xơnăm 2021-2026 tơguăt hăm pơm jang kiơ̆ tơchơ̆t jơnŭm pơgơ̆r tơring kơdrâ̆m păng hơmet pơ 'lơ̆ng jơnŭm pơgơ̆r tơring pơxĕl tơ̆ pơlei tơm Hà Nội”. Jơnŭm jang vei lăng kon pơlei pơlei tơm hlôi hăt hot jang atŭm hăm dôm Anih jang kơ Kuôk hô̆i, Khul tang măt ăn Kuôk hô̆i pơlei tơm vă tơlĕch jang đei jơnei dôm tơdrong jang hơlen đơ̆ng Kuôk hô̆i păng Anih juăt jang dơnơm kơ Kuôk hô̆i.