Kơdră Kuôk hô̆i Vương Đình Huệ hlôi năm ngôi tơ̆ ŭnh hnam yă Lê Thị Ngô (vă jê̆ 90 sơnăm), oei tơ̆ Tổ 3, phường Nghĩa Tân, pơlei tơm Gia Nghĩa, dêh char Dak Nông. Kơdră Kuôk hô̆i apĭnh jet gia jơhngơm jăn păng tơdrong arih sa kơ ŭnh hnam yă Lê Thị Ngô, tơƀôh jơhngơ̆m đon băt bơnê truh đe Mĕ Việt Nam nuih mơng, dôm bơngai đei kŏng hăm kach mang hlôi plang jơhngơ̆m, tơgop tih tên ăn tơdrong jang iung tơblăh iŏk rơngei hơdrĕch hơdrŭng, vei lăng teh đak, pơjing pơlei pơla teh đak.

Ŭnh hnam yă Lê Thị Ngô jĭ ŭnh hnam ‘lơ̆ng găh jơhngơ̆m đon, hơdrin kach mang vă kơ dôm jơhnơr đơ̆ng rŏng hŏk pơhrăm, lăng kiơ̆. Kơdră Kuôk hô̆i kŭm chơt hơiă ƀơ̆t tơdrong arih sa ŭnh hnam yă Lê Thị Ngô pơma hơdrô̆, dôm ŭnh hnam teh đak tơgŭm păng kon pơlei dêh char Dak Nông pơma atŭm roi ‘năr roi phĭ tơnŏ, mŭk drăm hơtŏk tơiung.