Drơ̆m kơ sơ̆ brei (15/10), tơ̆ Hnam Kuôk hô̆i, Kơdră Kuôk hô̆i Vương Đình Huệ hlôi pơgơ̆r pơm lêh tih păng pơgơ̆r pơma đam bơngai tang gĭt kăl 2 teh đak. Tơ̆ pơma đam, Kơdră Kuôk hô̆i tơroi rơđăh, Kuô̆k hô̆i Việt Nam răp gô păng lăng ‘lơ̆ng ‘măng năm ngôi, jĭ tơdrong jang gĭt kăl, tơgop hơmet ming, hơtŏk loi dơ̆ng pơvei tơbôl - jang hơdai đơ̆ng 2 Kuôk hô̆i pơma hơdrô̆ păng đơ̆ng 2 teh đak Việt Nam - Liên bang Nga pơma atŭm. 2 teh đak đei tơdrong pơvei jang hơdai gĭt kăl tôm tơdrong păng gơh tơroi ‘noh jĭ buăl joăt gĭt kăl.

Yua thoi noh, 2 Kuôk hô̆i kăl kơ tơgop lơ hloh dơ̆ng ăn tơdrong pơtrŭt pơvei 2 teh đak. 2 păh kăl tơchĕng dôm trong jang hơdai ‘nao vă hơnhăk tơdrong pơvei 2 pang roi ‘năr roi hơtŏk tơiung, lơ̆m noh đei tơdrong pơvei mŭk drăm, mơdro sa, tơmơ̆t jên jang.