Tơdrong jang đei chô̆ pơdah trư̆k tuyê̆n hăm 57 anih kơ Anih tơm Ƀô đô̆i vei sơlam teh kơ dôm dêh char, dôm kơđông linh vei sơlam teh tơ̆ tơring hơtaih yaih, achon đak dơsĭ. Tang măt ăn kơ Đảng, Teh đak, Kơdră Kuôk hô̆i hmach bơnê kơ dôm tơdrong jang đei jơnei đơ̆ng Khul linh vei sơlam teh jang đei lơ̆m khei năr âu ki; atŭm hăm noh, hmach bơnê kơ tơdrong hơdrin păng dôm tơdrong plang tih tên mă lei rơnguơ̆ tơ̆ tơring sơlam teh hơtaih yaih, tơnap tap, mă kăl lơ̆m dôm năr blŭng puih mak ‘nao, ah Têt truh Puih mak vih.

Khei năr truh, Kơdră Kuôk hô̆i Vương Đình Huệ pơkăl, khul ƀô đô̆i vei sơlam teh pơtoi băt hơdah, iŏk jang kơjăp dôm tơchơ̆t đơ̆ng Đảng, khôi luơ̆t teh đak gah sơnong vei sơđơ̆ng sơlam teh. Ƀơ̆t ‘măng âu, Kơdră Kuôk hô̆i hlôi pơtruh tơmam drăm pôk ăn dôm Kơđông linh vei sơlam teh pơm jang tơ̆ tơring tơnap tap, dôm Kơđông linh vei sơlam teh iŏk rong ‘me đe hơ-ioh pơti, đei tơdrong hơrih tơnap tap tơ̆ anih jang păng 354 hơ-ioh iĕ jing “Jing kon rong kơ Anih linh vei sơlam teh”.