Pơma ah ‘măng akŏm, Kơdră Kuôk hô̆i Trần Thanh Mẫn hlôi tơroi gah tơdrong đei jơnei đơ̆ng ‘Măng hop akŏm mă 7, Kuôk hô̆i jăl 15, kiơ̆ kơ noh dôm luơ̆t đei chih akŏm, tơchơ̆t đei Kuôk hô̆i hơlen lăng ah ‘Măng hop akŏm âu đei tơrĕk truh lơ tơdrong jang đei kon pơlei jơ̆p teh đak tơchĕng truh.

Kơdră kuôk hô̆i Trần Thanh Mẫn ăn tơbăt, kơtă lơ̆m năr 1/7, 10 luơ̆t đei tơrĕk kơtă truh hăm kon pơlei gô đei iŏk yua; athei băt, dôm Luơ̆t đei tơlĕch yua athei đei tơchơ̆t pơm kiơ̆ dôm tơdrong kăl. Kiơ̆ Kơdră Kuôk hô̆i, lơ tơring dang ei oei đei tơdrong mă kan ƀô̆ veh ver ưh kơ vă jang, pơm ăn tơchơ̆t pơm kiơ̆ vă hơtŏk tơ-iung tơ̆ tơring ưh đei jang hơtŏ hơnơ̆ng đơ̆ng dôm tơring. Kơdră Kuôk hô̆i pơkăl hơtŏk ki luơ̆t, tơdrong kơjăp lơ̆m khôi luơ̆t gah tơdrong pơgơ̆r jang vă chĕp vei tơdrong kơchăng, pơ̆n tơchĕng, pơ̆n pơm jang kơyuơ tơdrong pơyua hơtŭm.