Pơma ah jơ pơtơm, Kơdră Kuôk hô̆i Trần Thanh Mẫn ră hơdah, âu jing 'măng hop akŏm kăp gĭt hơlen lơ tơdrong tơgop nơ̆r vă chih akŏm, tơblang dôm luơ̆t đei Kuôk hô̆i pơma đam lơ̆m jơnŭm păng tơ̆ hnam akŏm adoi nhen dôm luơ̆t gô vă hơlen ah 'Măng hop akŏm mă 8, Kuôk hô̆i jăl 15. Kơdră Kuôk hô̆i ăn tơbăt, 'Măng hop akŏm mă 8 hlôi pơm jang đei hloh tong hơnê̆ khei năr pơkăp păng tŏk bŏk oei đei pơm jang kiơ̆ trŏ tơdrong tơplih 'nao, tơtom, pơklaih tơnap tap, tơhlăk tơhlĭn, akŏm jơhngơ̆m jang pran ăn hơtŏk mŭk drăm – tơpôl.

'Măng hop akŏm mă âu, Ƀok Tổng Bí thư Tô Lâm păng Kơdră Kuôk hô̆i hlôi đei ƀai đŏk tơbang pơtơm, lơ̆m noh ră hơdah tơdrong kăl tơplih 'nao gah chih akŏm luơ̆t teh đak, đei rim bơngai tang măt ăn Kuôk hô̆i drơ̆ng nơ̆r tôm.