Pơma tơ̆ lêh tơlĕch tơdrong jang chưk teh, ƀok Nguyễn Tấn Tuân- Kơdră Anih vei lăng kon pơlei dêh char Khánh Hòa tơbăt, tơdrong jang pơm trong đơ̆ng Trong gre 27C truh tơ̆ trong dêh char 656 - tơƀưh hăm dêh char Lâm Đồng păng dêh char Ninh Thuận năm klĕch 2 apŭng Khánh Vĩnh păng apŭng Khánh Sơn đei băt hơdăh ‘noh jĭ tơdrong jang gĭt kăl teh đak, đei pơm trong jăl III tơring groi kông, kơjung dang 56,7 km. Akŏp kơsô̆ jên pơm ‘noh 1.930 ti hlak jên, khei ‘năr pơm trong ‘noh đơ̆ng sơnăm 2023 truh đĭ sơnăm 2027.

Tơdrong jang pơm trong đơ̆ng Trong gre 27C truh trong dêh char 656 - tơƀưh hăm dêh char Lâm Đồng păng dêh char Ninh Thuận jĭ trong nơnăm gĭt kăl, tơƀưh 2 apŭng groi kông Khánh Sơn păng Khánh Vĩnh, pơm tơdrong hiôk hơtŏk tơiung mŭk drăm - tơpôl 2 apŭng âu pơma hơdrô̆ păng dêh char Khánh Hòa pơma atŭm, hơtŏk tơdrong tơƀưh trong nơnăm, chơ chuĕn tơmam 2 tơring hăm dêh char Lâm Đồng păng Ninh Thuận; hơtŏk loi dơ̆ng vei lăng sơđơ̆ng teh đak, sơđơ̆ng lơ̆m tơring, pơm jing tơdrong jang trong nơnăm hiôk lơ̆m rim tơdrong vă vei sơđơ̆ng teh đak, pơvih pơvăn đei yua tơdrong jang dăr joang, vei lăng bri.

Lơ̆m ‘năr 1/3 mơ̆n, Kơdră Kuôk hô̆i Vương Đình Huệ kŭm hăm khŭl bơ̆jang hlôi pơjao asong 200 tŏ hnam ‘mêm mơnat ăn dôm ŭnh hnam dơnuh hin kơ apŭng Khánh Sơn păng apŭng Khánh Vĩnh.