Iung pơma pơtôch tơ̆ hop akŏm, Kơdră Kuôk hô̆i Vương Đình Huệ hơlen lăng sơnăm 2023 dôm khŭl tang măt Kuôk hô̆i hlôi hơdrin hơtŏk jơhngơ̆m đon pơjing khôi luơ̆t kơchăng, dăr hơlen đei yua păng tơlĕch trong jang tơtom, hơtŏk ‘lơ̆ng jơhngơ̆m đon jang tơnăp, lơ̆m tơdrong jang pơjing khôi luơ̆t, tơchơ̆t dôm tơdrong gĭt kăl kơ teh đak păng dăr lăng, tơƀơ̆p pơma dơnuh hăm bơngai tăh hla, tơdrong sơng kon pơlei, răp hơlen lăng, kiơ̆ hơlen tơdrong hơmet pơ ‘lơ̆ng hla ar kơ thơ tơ kêng, tơ hlâu đơ̆ng kon pơlei.

Tơ̆ hơnăp kơnh, Kơdră Kuôk hô̆i Vương Đình Huệ athei, dôm khŭl tang măt Kuôk hô̆i, dôm bơngai tang măt Kuôk hô̆i hơtŏk dôm jơnei hlôi iŏk đei, hơnơ̆ng pơih să, hơtŏk dơ̆ng tơdrong jang, hơtŏk loi dơ̆ng bơ̆jang ‘lơ̆ng đơ̆ng khŭl tang măt kuôk hô̆i. Mă loi ‘noh jĭ, hơnơ̆ng vei kơjăp anih dơ̆ng, hơnăp jang ‘lơ̆ng đơ̆ng khŭl tang măt Kuôk hô̆i lơ̆m pơgơ̆r păng bơ̆jang kơ Kuôk hô̆i Việt Nam pơma atŭm. Kơdră Kuôk hô̆i tơ tă, khŭl tang măt Kuôk hô̆i vang jang hơdai hăm Jơnŭm vei lăng Hơdrĕch kon kông păng dôm Anih jang kơ Kuôk hô̆i dăr hơlen tơ̆ tơring; răp hơlen lăng, kiơ̆ hơlen lăng tơdrong hơmet pơ ‘lơ̆ng tơdrong tơkêng, tơhlâu, apĭnh đơ̆ng bơngai tăh hla.