Tơ̆ Lêh tơbăt, tang măt kơdră chĕp kơ̆l Đảng, teh đak, Kơdră Kuôk hô̆i Vương Đình Huệ hlôi pơjao asong Mê đai Bơ̆jang dơ̆ng mă Mônh ăn kơ đĭ đăng ƀăo Bơngai Tang măt Kon pơlei. Ƀăo bơngai tang măt Kon pơlei gô hơnơ̆ng jing đon măt vang tơchĕng, vang pơma, jing tơpang ti vang jang hăm bơngai tăh hla păng kon pơlei lơ̆m teh đak.

Pơma tơ̆ jơ pơm lêh, Phŏ Kơdră Kuôk hô̆i Trần Thanh Mẫn athei, lơ̆m khei ‘năr tơplih kơ sô̆ păng mơ̆t jang hơdai hăm apŭng plĕnh teh tŏk bŏk đei ƀôh pran kơtang hrei ‘nâu, rim kang ƀô̆, bơngai chih kơtơ̆ng ang, bơngai chih hơmet ming kơ ƀăo athei iŏk yua kơmăy kơmŏk, iŏk jang đei yua tơdrong pran hơdrô̆ đei, roi tơbăt 1 trong tơpăt, ‘lơ̆ng tơ tĕnh păng hơiă, vă ƀăo Bơngai tang măt kon pơlei jing 1 lơ̆m dôm anih jang chih kơtơ̆ng ang năm hơdrol lơ̆m tơplih kơ sô̆ đơ̆ng dôm anih jang chih kơtơ̆ng ang lơ̆m teh đak.