Đơ̆ng rŏng 34 sơnăm  pơjing dêh char, Quảng Trị tŏk bŏk oei tơplih 'nao păng hơtŏk tơ-iung. Quảng Trị roi năr roi hơtŏk pơih să jang mŭk drăm, tơgop lơ̆m tơdrong hơtŏk atŭm kơ teh đak. Tơdrong hơtŏk tơmam drăm đei pơm tơlĕch lơ̆m tơring (GRDP) đơ̆ng sơnăm 2021-2022 đei iŏk 6,9% 1 sơnăm, 6 khei blŭng sơnăm 2023 tŏk 6,52%. Tơmơ̆t lơ̆m jên mong kơ teh đak ah sơnăm 2021 đei 160% pơkăp păng sơnăm 2022 đei 113% pơkăp. Tơdrong pơm kiơ̆ Tơchơ̆t kơsô̆ 43 đơ̆ng Kuôk hô̆i gah pơm jang jên hu su kăk tơgŭm ăn Tơdrong jang hơmet păng hơtŏk mŭk drăm – tơpôl păng Tơchơ̆t kơsô̆ 11 đơ̆ng Jơnŭm pơgơ̆r teh đak gah Tơdrong jang hơmet păng hơtŏk mŭk drăm – tơpôl  đei tơlĕch jang kăp gĭt.

Pơma sơkơ̆t ah jơ bơ̆ jang, Kơdră Kuôk hô̆i  Vương Đình Huệ pơkăl Anih jang Đảng dêh char athei tenh kuăng keh đang hla bar pơkă dêh char Quảng Trị đơ̆ng sơnăm 2021-2030, vă iŏk jang kiơ̆ mŭk drăm, tơdrong pran mă po hlôi đei; ră hơdăh truh tơdrong “hơpơi đei rơngei hiôk hian” tơ̆ Quảng Trị, Kơdră Kuôk hô̆i akhan, jing tơring teh pŭ lơ ƀôm 'mrâ̆m pơrăm kơtang hloh lơ̆m 2 tơdrong tơblăh pơ rơngei đơ̆ng hơdrung hơdrĕch po, Quảng Trị jing tơring trŏ ƀlep vă tơroi gah “hơpơi đei rơngei hiôk hian”.