Kơdră Kuôk hô̆i Vương Đình Huệ pơma hơdăh, Việt Nam lăng kăl păng khŏm pơtrŭt tơdrong pơvei jang hơai gĭt kăl hăm Malaysia roi ‘năr roi yak mơ̆t jrŭ, tơpă păng đei yua. Kiơ̆ lơ̆m tơdrong pơvei chĭnh trĭ tôch kơ ‘lơ̆ng hơiă păng lui ngeh dih băl, Kơdră Kuôk hô̆i Vương Đình Huệ păng Thủ tướng Anwar Ibrahim hlôi pơma dơnuh rơ hâu găh lơ tơdrong jang hơdai đơ̆ng 2 teh đak tơ̆ hơnăp kơnh, pơtrŭt jang đang dôm tơdrong drơ̆ng nơ̆r jang hơdai gĭt kăl đơ̆ng teh đak.

Ƀar păh pơma hơdăh tơdrong gĭt kăl đơ̆ng tơdrong jang tŏk mơdro sa kiơ̆ trong hơtŏ băl ƀiơ̆; jang hơdai set hơlen, tơchĕng hơlen, pơjing trong jang pơtrŭt jang hơdai lơ̆m rôp yâu ka hơdang, pơm tơlĕch păng tĕch ka hơdang yua kơ ‘nâu jĭ tơdrong jang 2 păh đei ‘meh vă păng gơh tơmơ̆t dơ̆ng ăn băl; tơgŭm jang hơdai, tơgŭm anih mơdro sa tơ̆ Việt Nam lơ̆m tơdrong jang kơmăy kơmŏk tơmam sa Halal mă Malaysia đei tơdrong pran păng Việt Nam đei lơ tơmam ‘lơ̆ng. Thủ tướng Malaysia drơ̆ng nơ̆r set hơlen, hơtŏk răt tơmơ̆t 1,2 tơmam đơ̆ng Việt Nam.