Kơdră Kuôk hô̆i Vương Đình Huệ pơma hơdăh, Kuôk hô̆i 3 teh đak, tôch kơ kăl vang tơgŭm, tơgop jơ hngơ̆m, tơgop hơmet ming tơdrong lui ngeh chĭnh trĭ, tơdrong tơbôl joăt joe păng tơgoăt tơgoăl gĭt kăl Campuchia - Lào - Việt Nam. Tơdrong pơvei tơgoăt tơgoăl tơbôl, tơklep hơdai păng lui ngeh chĭnh trĭ đơ̆ng 3 teh đak Campuchia - Lào - Việt Nam ‘noh jĭ tơdrong kăp gĭt, đei tơdrong ‘lơ̆ng gĭt kăl đunh đai lơ̆m tơdrong jang pơjing, vei lăng păng hơtŏk tơiung kơ 3 teh đak.

Việt Nam ling lang lăng kăl păng lăng ‘nâu jĭ hơnăp jang gĭt kăl păng tơgŭm hơdrol lơ̆m tơdrong jang tơgŭm jang tơbôl đơ̆ng Việt Nam. Kơdră Kuôk hô̆i Vương Đình Huệ athei, Kuôk hô̆i 3 teh đak pơtrŭt dôm khŭl kơdră teh đak păng dôm pang ƀơm truh pơtrŭt bơ̆jang kiơ̆ dôm tơdrong hơgăt hơtŏk tơiung kơjăp jơ̆p plei teh, tơjră hăm tơplih tŏ ‘mi kial.