Năm hơpong Tổng Bí thư, Kơdră teh đak Lào Bounnhang Vorachith păng Thủ tướng so sơ̆ kơ teh đak Lào Thongsing Thammavong, Kơdră Kuôk hô̆i  Vương Đình Huệ chơt hơ-iă đei tơƀơ̆p ‘nhŏng oh, rim boăl juăt kơ Đảng, Teh đak păng kon pơlei Việt Nam.

Kơdră Kuôk hô̆i Vương Đình Huệ thơ thâu hơ-iă hăm đe kơdră so sơ̆ kơ teh đak Lào ƀơ̆t tơbăt 48 sơnăm năr tơ-iung pơjing teh đak păng hmach bơnê kơ dôm tơdrong jang lơ̆m teh đak păng jang tơbôl đei jơnei tih tên mă Đảng, Teh đak păng Kon pơlei Lào ‘nhŏng oh jang đei lơ̆m dôm sơnăm âu ki, lơ̆m noh đei dôm tơgop kăp gĭt đơ̆ng đe kơdră kơpal so sơ̆ kơ teh đak Lào. Kơdră Kuôk hô̆i lui ngeh, hăm tơdrong pơgơ̆r gơh hơgei đơ̆ng Đảng Kon pơlei Kăch mang Lào, teh đak Lào gô găn hloh rim tơnap tap, roi năr roi hơtŏk tơ-iung jơnap, kon pơlei Lào ‘nhŏng oh roi năr roi phĭ tơtŏ dơnŏ ‘lơ̆ng.