Kơdră Kuôk hô̆i Vương Đình Huệ chơt hơ-iă ah truh tơmang Thượng Hải, pơlei tơm đei tam mă truh 0,1% hơgăt teh kơ teh đak Trung Quốc mă lei jing pơlei tơm kơdrơ̆m măt bơngai hloh, đei kơsô̆ GDP pran păng yuk hơlâu lơ̆m tơdrong hơmet pơih ‘măng, gơh hơgei gah khua hŏk kơ teh đak Trung Quốc. ‘Nâu adoi jing anih mă ƀok Tổng Bí thư, Kơdră teh đak Tập Cận Bình tơlĕch tơchơ̆t gah tơdrong rơngei hiôk hian lơ̆m tơchơ̆t jang, rim Anih jang hơnơ̆ng tơrĕk truh tơdrong akŏm iŏk nơ̆r pơma đơ̆ng lơ kon pơlei lơ̆m tơdrong chih akŏm khôi luơ̆t teh đak.

Vang năm akŏm pơma đam hăm dôm bơngai hŏk kơjung păng kon pơlei tơ̆ tơring gah chih akŏm luơ̆t teh đak,  Kơdră Kuôk hô̆i Vương Đình Huệ tơroi gah tơdrong hlôh vao đơ̆ng Việt Nam lơ̆m tơdrong iŏk nơ̆r tơgop chih Akŏm Luơ̆t, pơtih nhen Luơ̆t teh (Hơmet tơplih) hlôi đei hloh 12 trĭu nơ̆r tơgop. Kơdră Kuôk hô̆i ăn tơbăt, gô hŏk hơlen tơdrong hlôh vao pơm jang đơ̆ng Trung Quốc păng sơkơ̆t Kuôk hô̆i Việt Nam gô ưh đei lê̆ rim nơ̆r pơma yơ đơ̆ng kon pơlei, anih jang mŭk drăm, đơ̆ng bơngai jang tang măt ăn Kuôk hô̆i pơtruh mă ưh đei chih iŏk, tơblang hơdah.