Asong tơmam ăn kơ hloh 360 ŭnh hnam teh đak tơgŭm, bơngai đei kŏng, ŭnh hnam dơnuh hin, bơngai răm đơ̆ng pơgang điôxin, kŏng nhân, bơngai jang đei tơdrong arih sa mơmat tat đei măt tơ̆ Hnam joh ayŏ dêh char Bạc Liêu, Kơdră Kuôk hô̆i Vương Đình Huệ pơma hơdăh, Đảng, Teh đak kŭm nhen Kuôk hô̆i, Khŭl kơdră teh đak lơ̆m rim tơdrong jang đơ̆ng kơdih ling lang hơdrin vă hơtŏk tơiung mŭk drăm - tơpôl vă vei lăng ‘lơ̆ng ăn kơ kon pơlei. Tơ̆ hơnăp kơnh, Kơdră Kuôk hô̆i athei rim kơdră đảng, kơdră chĕp kơ̆l, Mặt trận Tổ quốc păng dôm khŭl grŭp lơ̆m dêh char vei kơjăp, tơlĕch jang kiơ̆ ‘lơ̆ng tơdrong Tơchơ̆t kơ sô̆  26 đơ̆ng Ban Bí thư găh pơgơ̆r Tết Giáp Thìn sơnăm 2024, vei sơđơ̆ng mă ‘lơ̆ng ăn kon pơlei; vei lăng ăn ŭnh hnam teh đak tơgŭm, ŭnh hnam đei kŏng hăm kach mang, dôm bơngai đei tơdrong arih sa mơmat tat đei chơt hơiă pơyan puih mak, sơng Tết tơnŏ hiôk păng mă sơđơ̆ng ‘lơ̆ng.

Kŭm lơ̆m kơ sơ̆ 25/1, Kơdră Kuôk hô̆i Vương Đình Huệ păng Khŭl bơ̆jang Trung ương tơƀơ̆p muh măt Khŭl chĕp kơ̆l pơgơ̆r Anih jang Đảng dêh char Bạc Liêu. Kơdră Kuôk hô̆i tơtă kơ dêh char tơtĕnh pơjing trong tơlĕch jang, tơdrong jang mă lăp proh hơmet tơring kiơ̆ lơ̆m tŭn pran sơng đei tơmơ̆t jên jang, iŏk jang tôch ai tơmam, tơdrong ‘lơ̆ng kơ tơring, hơtŏk tơiung mŭk drăm, tơpôl păng vei sơđơ̆ng teh đak, sơđơ̆ng tơring tơmăn đak krong Cửu Long truh sơnăm 2030, lăng truh sơnăm 2045.