Kiơ̆ tơdrong jang, Hop akŏm mŭk drăm, tơpôl Việt Nam sơnăm 2023 đei hơnăn “Pơih trong ‘lơ̆ng, pơjing jơhngâm pran ‘nao ăn tơdrong jang tŏk păng atŏk tơiung pran kơjăp”. Kơdră Kuô̆k hô̆i Vương Đình Huệ akhan, Hop akŏm athei pơm hơdăh rim tơdrong lơ̆m apŭng plenh tĕh, trong oei tơplih găh tơdrong jang mŭk drăm păng dôm tơdrong nol ‘nao hăm tơdrong jang tơiung ming, jang tŏk mŭk drăm păng dôm tơdrong ƀơm truh tơ̆ Việt Nam, hop akŏm athei hơlen năng rim tơdrong, dôm tơdrong đei đơ̆ng ‘ngoăih kŭm nhen tơdrong jang mŭk drăm kơ tĕh đak lơ̆m 6 khei blŭng sơnăm 2023. 

Ƀơm truh tơdrong “Hơmet pơ ‘lơ̆ng tơdrong tơhlăk, pơih trong hiôk hian, tơgŭm ăn anih jang mŭk drăm/tĕch mơdro yak hlŏh pơmat tat”, tơ̆ hop akŏm, dôm bơngai tang măt pơma hơdăh dôm tơdrong pran ‘lơ̆ng ‘nŏh jĭ khei ‘năr âu ki mŭk drăm, lơ̆m tĕh đak sơđơ̆ng ‘lơ̆ng păng kăl đei jang tŏk klăih dôm tơdrong nol dơ̆ng vă “iŏk dơ̆ng” jơhngâm jang tŏk, pơjing tơdrong ‘lơ̆ng ‘nao tơ̆ hơnăp kơnh. Dôm bơngai tang măt kŭm lăp đon hăm tơdrong “Vei lăng ‘lơ̆ng tơdrong jang, tơdrong arih xa tơpôl, tơgop pơjing jơhngâm pran vă jang tŏk pran kơjăp” păng athei hơtŏk đon hlôh vao ăn bơngai jang, hơmet pơ ‘lơ̆ng ƀao hiêm tơpôl, vei sơđơ̆ng tơdrong arih xa, năm truh tơdrong jang tŏk rơgŏh ‘lơ̆ng, jang tŏk pran kơjăp.