Kơdră Chính hiệp teh đak Trung Quốc Vương Hộ Ninh hôn bơnê Kơdră Kuôk hô̆i Vương Đình Huệ năm hơpong tơ̆ Trung Quốc ‘măng mă blŭng hăm kơchư̆k ‘nao. 2 ‘nu kơdră drơ̆ng nơ̆r pơm pơ ‘lơ̆ng hlŏh dơ̆ng tơdrong jang hơdoi đơ̆ng Mặt trận Tổ quốc Việt Nam păng Chính hiệp teh đak Trung Quốc, hơtŏk tơdrong pơma nuh găh tơdrong kăl vă pơm hơtŏk ‘lơ̆ng hlŏh, đei yoa ‘lơ̆ng hlŏh hơnăp jang đơ̆ng rim anih jang lơ̆m tơdrong arih xa, bơ̆ jang chinh trĭ tơ̆ rim teh đak.

Kơdră Quốc hội athei 2 păh hơtŏk tơdrong jang hơdoi găh tĕch mơdro kiơ̆ trong hơtŏ băl, kơjăp đunh; hơtŏk tơdỏng jang hơdoi, pơm trong tơƀưh ăn trong teh, trong gre treng, pơlung anih tĕch mơdro Trung Quốc tơmât jên ăn dôm tơdrong jang tih, ‘lơ̆ng, tơƀôh ăn đon rơgei mưh jang tŏk đơ̆ng Trung Quốc; pơgơ̆r ‘lơ̆ng dôm tơdrong tơƀâp băl, tơdrong pơvei ăn kon pơlei nhen Tơdrong tơƀâp đơ̆ng druh dăm, Hop akŏm kon pơlei, pơma nuh đơ̆ng dôm bơngai jang lơ̆m anih Mặt trận Tổ quốc Việt Nam păng Chính hiệp teh đak Trung Quốc nhen công đoàn, drŏ kăn.

Lơ̆m jơnăr năm ngôi tơ̆ teh đak CHND Trung Hoa đơ̆ng kơdră Kuôk hô̆i Vương Đình Huệ, pơgê ‘năr 09/4, tơ̆ Bắc Kinh, Anih jang gre păr teh đak Việt Nam (Vietnam Airline) pơgơ̆r Lêh tơbăt 30 sơnăm trong păr păng kơ kuh chơt hơiă ‘măng păr mă 100.000 trong păr Việt Nam – Trung Quốc. Lơ̆m 30 sơnăm, jô̆ đơ̆ng ƀơ̆t pơtơm pơih anih mơdro sa Trung Quốc, Vietnam Airlines hlôi bơ̆jang kiơ̆ 100.000 ‘măng păr, chơ chuĕn hloh 11 triệu ‘nu tơmoi păng 166 rơbâu tấn tơmam. Kăl kơ lăng truh, yak hloh dôm tơdrong mơmat tat đơ̆ng Covid-19, Vietnam Airlines jĭ 1 lơ̆m Anih jang gre păr mă blŭng pơih dơ̆ng trong păr truh Trung Quốc păng hơdrin pơvei dôm tơdrong jang pơtrŭt gre păr, tơmang lăng tơ̆ âu đơ̆ng rŏng kơ jĭ hơbuh đei vei lăng. Tơ̆ tơdrong jang, Vietnam Airlines păng dôm khŭl jang kơ Trung Quốc hlôi kĭ hla ar jang hơdai mơdro sa 2 pang păng hơtŏk loi dơ̆ng jang hơdai lơ̆m dôm trong păr đơ̆ng Việt Nam păng Trung Quốc.