Đơ̆ng rŏng kơ lêh sơng, Kơdră Kuôk hô̆i Vương Đình Huệ pơgơ̆r pơma đam hăm Kơdră Kuôk hô̆i teh đak Phần Lan Jussi Halla-aho. Hơdrol kơ noh, Kơdră Kuôk hô̆i teh đak Cộng hòa Phần Lan Jussi Halla-aho hlôi truh ‘măn kơvang pơkao, mơ̆t pơjôk pơsat Ƀok Kơdră Hồ Chí Minh. Lơ̆m ‘măng năm tơmang âu, Kơdră Kuôk hô̆i teh đak Cộng hòa Phần Lan Jussi Halla-aho gô pơma đam hăm Thủ tướng teh đak bơ̆n Phạm Minh Chính; truh hmach kơ bơngai jang lơ̆m Ƀan ƀĭ thư, Kơdră Anih pơgơ̆r jang Trung ương Trương Thị Mai păng đei minh ƀar tơdrong jang nai dơ̆ng.

Kiơ̆ đơ̆ng ‘măng năm tơmang đơ̆ng Kơdră Kuôk hô̆i Jussi Halla-aho, Việt Nam hơpơi ‘meh hơtŏk hloh dơ̆ng tơdrong jang hadoi đơ̆ng Anih jang gah luơ̆t kơ 2 teh đak, ‘nhăk tơdrong jang hadoi kơ 2 teh đak lơ̆m lơ tơdrong jang roi năr roi đei jơnei tơnăp; pơm trong vă pơih să ăn tơdrong jang hadoi kơ 2 teh đak lơ̆m lơ tơdrong jang phara băl, mă kăl noh hơtŏk jang đei jơnei gah jang hadoi mŭk drăm kơ 2 teh đak; hơtŏk jang hadoi lơ̆m hop akŏm lơ pah nhen Liên hơp kuôk, Jơnŭm jang Ngĭ viê̆n Apŭng plenh teh.