Tơ̆ Hnam Kuôk hô̆i, Kơdră Kuôk hô̆i Vương Đình  Huệ đei jơ pơma đam hăm Kơdră Thượng viện teh đak Bỉ Stéphanie D’Hose. 2 kơdră chĕp kơ̆l Kuôk hô̆i/Nghị viện hôn bơnê dôm jơnei ‘lơ̆ng lơ̆m tơdrong pơvei jang hơdai đơ̆ng 2 teh đak khei ‘năr âu ki. Kơdră Kuôk hô̆i Vương Đình Huệ akhan, tơdrong ‘lơ̆ng jang hơdai đơ̆ng 2 teh đak găh mơdro sa - tơmơ̆t jên jang oei tôch kơ tih. Lơ̆m tơdrong dôm teh đak tŏk bŏk hơtŏk trong jang pơtrŭt tơmơ̆t jên jang, 2 teh đak kăl hơnơ̆ng jang hơdai trong jang pơtruh dang ei đei păng pơjing dôm trong jang pơtruh ‘nao.

Kơdră Kuôk hô̆i athei, Bỉ pơm tơdrong hiôk ăn tơmam tĕch tơ̆ teh đak đe đơ̆ng Việt Nam gơh tĕch tơ̆ anih tĕch mơdro Bỉ păng EU, mă loi ‘noh tơmam ka hơdang, tơmam đơ̆ng choh jang sa joăt joe kơ Việt Nam nhen phe, cheh phe... Pơma hơdăh, tơplih kơ sô̆ păng tơplih ŭnh hơyuh ‘noh jĭ 2 tơdrong jang tơplih đei tơdrong ‘lơ̆ng jơ̆p plei teh păng Bỉ jĭ teh đak tôch kơ tŏk tơiung lơ̆m 2 tơdrong jang ‘nâu, ƀok Vương Đình Huệ ‘meh vă nghị viện Bỉ vang tơroi tơdrong hlôh vao pơjing trong jang tơgŭm hăm Kuôk hô̆i Việt Nam.