Tang măt ăn Kuôk hô̆i Việt Nam, Kơdră Kuôk hô̆i Vương Đình Huệ thơ thâu hơ-iă Campuchia pơgơ̆r keh kong tơdrong pôk rơih Kuôk hô̆i jăl 7; thơ thâu hơ-iă kơ ƀok Samdech Hun Manet đei Kuôk hô̆i pôk jang Thủ tướng teh đak. Kơdră Kuôk hô̆i Vương Đình Huệ lui ngeh akhan, Campuchia gô đei jơnei tih hloh, tơgop hơtŏk anih dơ̆ng kơ Campuchia tơ̆ tơring păng lơ̆m apŭng plenh teh. Tơ̆ jơ pơma đam, 2 ƀok kơdră atŭm hmach bơnê kơ tơdrong đei jơnei gah mŭk drăm, tĕch pơdro kơ 2 teh đak.

Sơnăm 2022, tơmam tĕch pơdro kơ 2 pah 'măng mă blŭng đei hloh 10 tih đôlar. Truh âu kơnh, 2 pah kăl akŏm jang hadoi, tơgŭm dih băl pơjing tơdrong jang mŭk drăm hiôk hian, kơdih jang hadoi lơ̆m apŭng plenh teh; hơtŏk jang mŭk drăm 2 pah, đei hloi tôm tơdrong jang, mă kăl noh 2 pah hơtŏk ming man trong nơnăm, lơ̆m noh ming man jăl trong gre kơdâu renh, hơtŏk 'măng păr kơ 2 teh đak...