Ƀar pah drơ̆ng nơ̆r tơlĕch jang đei jơnei “Tơchơ̆t atŭm gah tơdrong pơtoi pơm hơdah păng hơtŏk jang Tơbôl tôm tơdrong, pơjing Jơnŭm jang tơglơng hơnô̆ hơnăp kơnh Việt Nam - Trung Quốc kăp gĭt gah tơlĕch jang”; iŏk jang sơnong dơnơm kơ Kuôk hô̆i lơ̆m tơdrong hơtŏk jang hadoi kơ 2 teh đak. Ƀok Kơdră  Kuôk hô̆i Vương Đình Huệ pơkăl, 2 pah hơtŏk pran tơdrong tơlĕch hơtŏk pơ-‘lơ̆ng, đei jơnei tơdrong jang hadoi lơ̆m dôm tơdrong jang, Kơdră Kuôk hô̆i Vương Đình Huệ hơpơi ‘meh, 2 pah atŭm băl pơjing tơdrong asong jang ‘nao kơ dôm anih jang mŭk drăm pran, gơh hơgei gah kơmăi kơmŏk đơ̆ng Trung Quốc tơ̆ Việt Nam.

Đơ̆ng rŏng pơtôch pơma đam, Kơdră Kuôk hô̆i Vương Đình Huệ păng Kơdră Kuôk hô̆i Trung Quốc Triệu Lạc Tế hlôi kĭ hla bar tơchơ̆t pơdrơ̆ng jang hadoi đơ̆ng Kuôk hô̆i Việt Nam păng Kuôk hô̆i teh đak CHND Trung Hoa.

Lơ̆m ‘năr brei, Kơdră Kuôk hô̆i Vương Đình Huệ sơng kơdră minh ƀar Anih jang pran gah trong nơnăm, trong gre treng, unh hơyuh kơ teh đak Trung Quốc; năm hơpong Anih jang Hơlen păng Hơtŏk tơ-iung kơ Anih jang Huawei.