Tơ̆ jơ pơma dơnuh, Kơdră Kuôk hô̆i Vương Đình Huệ pơma hơdăh Việt Nam ling lang lăng kăl păng ‘meh vă hơtŏk loi dơ̆ng lui ngeh păng pơm ‘lơ̆ng hloh dơ̆ng tơdrong pơvei jang hơdai gĭt kăl đơ̆ng 2 teh đak; vang hơdai băl hơdrin yak truh hơtŏk tơdrong pơvei tơ̆ hơnăp âu kơnh. 2 Kơdră chĕp kơ̆l drơ̆ng nơ̆r hơtŏk loi dơ̆ng pơma dơnuh khŭl kơdră kơpal păng rim kơdră, tơlĕch jang đei yua dôm trong jang hơdai đơ̆ng 2 teh đak.

Pơma dơnuh găh dôm tơdrong jang hơdai kênh nghị viện, 2 kơdră chĕp kơ̆l drơ̆ng nơ̆r hơtŏk loi dơ̆ng jang hơdai đơ̆ng anih jang pơjing khôi luơ̆t 2 teh đak; tơroi băl tơdrong kơtơ̆ng ang, tơgŭm băl tơdrong hlôh vao, hơtŏk hơnăp jang đơ̆ng Grŭp Nghị sỹ tơbôl 2 teh đak; jang hơdai, tơgŭm băl tơ̆ dôm hop akŏm lơ pang, jang hơdai pơvei tơgoăt tơgoăl păng hơnăp jang tơm đơ̆ng ASEAN, mă loi ‘noh jĭ lơ̆m dôm tơdrong tơring nhen tơdrong Biển Đông, Myanmar.