Kơdră Kuôk hô̆i Vương Đình Huệ pơma hơdăh, ‘măng năm ngôi đei tơdrong ‘lơ̆ng gĭt kăl ƀơ̆t 2 teh đak ‘nao tơbăt 10 sơnăm pơvei Jang hơdai gĭt kăl (2013-2023); lui ngeh akhan jơnei đơ̆ng ‘măng năm ngôi gô jing tơdrong hơiă gĭt kăl vă 2 teh đak vang yak truh hơtŏk tơdrong pơvei Jang hơdai gĭt kăl tŏk ‘nao, yak truh tơbăt  70 sơnăm 2 teh đak pơjing tơdrong pơvei jang tơbôl lơ̆m sơnăm 2025.

Tơ̆ jơ pơma dơnuh, 2 kơdră chĕp kơ̆l drơ̆ng nơ̆r kăl kơ hơnơ̆ng pơma dơnuh đơ̆ng khŭl dôm kơdră, hơtŏk ‘lơ̆ng đei yua dôm trong jang hơdai dang ei đei, hơdrin hơnhăk jên mơdro sa 2 pang jăh iŏk đei 15 ti USD, 2 păh pơm tơdrong hiôk ăn kơ dôm tơmam tĕch tơ̆ teh đak đe tơm kơ 2 teh đak; vang tơroi tơdrong hlôh vao pơjing trong jang vă hơtŏk tơiung tơdrong jang kơmăy kơmŏk; tơgŭm pơtrŭt dôm trong jang tơgŭm vă tŭn hrĕnh tơdrong tơplih ŭnh hơyuh; vei sơđơ̆ng pơm tơ ‘ngla kơdih, hiôk hian lơ̆m tơdrong jang ŭnh hơyuh rơgoh. Kơdră Kuôk hô̆i Vương Đình Huệ ‘meh vă 2 teh đak hơnơ̆ng jang hơdai kơjăp hloh dơ̆ng lơ̆m tơdrong jang Khŭl kơdră teh đak kŭm nhen nghị viện vă tơgop hơmet ‘lơ̆ng tơdrong tơgoăt tơgoăl, drơ̆ng nơ̆r, hơnăp jang tơm đơ̆ng ASEAN, hơtŏk hơnăp jang đơ̆ng IPA kŭm nhen pơvei tơdrong rơngei, sơđơ̆ng tơ̆ tơring.