Tơ̆ jơ pơma dơnuh, ƀok Vương Đình Huệ pơma hơdăh Việt Nam ling lang bơngơ̆t truh, răp hơlen păng chơt hơiă tơ̆ hơnăp dôm jơnei ‘lơ̆ng hơiă mă Bulgaria hlôi iŏk đei lơ̆m tơdrong jang hơtŏk tơiung mŭk drăm - tơpôl khei ‘năr âu ki, tơgop hơmet ming păng hơtŏk ‘lơ̆ng hơnih dơ̆ng đơ̆ng Bulgaria lơ̆m apŭng plĕnh teh.

2 păh drơ̆ng nơ̆r jăh pơgơ̆r hloi Jăl hôp 24 Anih jang 2 khŭl kơdră teh đak Việt Nam- Bulgaria lơ̆m sơnăm 2023 vă  dăr hơlen, drơ̆ng nơ̆r dôm trong jang hơdăh pơtrŭt jang hơdai mŭk drăm - mơdro sa- tơmơ̆t jên jang đơ̆ng 2 teh đak. Pơma dơnuh găh dôm tơdrong tơring păng apŭng plĕnh teh, 2 kơdră chĕp kơ̆l drơ̆ng nơ̆r hơtŏk loi dơ̆ng jang hơdai kơjăp păng jang hơdai lơ̆m dôm hop akŏm lơ pang păng tơring, mă loi ‘noh jĭ tơ̆ Liên hợp quốc, ASEM, ASEAN-EU.