Kơdră Kuôk hô̆i Vương Đình Huệ chơt hơ-iă đei tơjrâ̆m đe Kơdră kơpal kơ Jơnŭm jang Tơbôl Iran - Việt Nam păng ƀok Kơdră Jơnŭm jang 'noh Seyed Kamal Sajjadi, bơngai hlôi jang kơdră tang măt ăn teh đak Iran tơ̆ Việt Nam, tơguăt kơjăp hăm Việt Nam păng adoi jing Kơdră pơjing Jơnŭm jang Tơbôl Iran - Việt Nam.

Kơdră Kuôk hô̆i sơkơ̆t hơdah Việt Nam ling lang lăng tơgĭt păng hơpơi 'meh hơtŏk jang tơbôl, jang hadoi lơ tơdrong hăm Iran. 'Măng năm tơmang đơ̆ng Khul Kơpal mă âu tơgop hơtŏk tơbôl kơ 2 teh đak kiơ̆ sơkơ̆t Đảng, Kuôk hô̆i, Jơnŭm pơgơ̆r teh đak păng tơring, mă kăl noh hơtŏk tơmang ăn kon pơlei. Kơdră Kuôk hô̆i hơpơi 'meh Jơnŭm jang Tơbôl Iran- Việt Nam pơtoi tơlĕch lơ tơdrong jang tơmang kon pơlei, tơgop kăp gĭt hloh lơ̆m tơdrong jang tơbôl kơ 2 teh đak pơma atŭm.