Tơ̆ jơ sơng, Kơdră Kuôk hô̆i Vương Đình Huệ bơnê kơ dôm tơdrong hơtŏk ‘lơ̆ng lơ̆m tơbôl kơ 2 Đảng, 2 teh đak lơ̆m khei năr âu ki, mă kăl noh tơdrong 2 pah drơ̆ng nơ̆r pơtoi kơhret păng hơtŏk jang tơbôl tôm tơdrong, pơjing "Jơnŭm jang vang glơng khei năr hơnô̆ hơnăp kơ Việt Nam - Trung Quốc kăp gĭt tôm tơdrong".

Ƀar pah chơt hơ-iă ƀôh khei năr âu ki, 6 trong jang hadoi tih tên đơ̆ng 2 teh đak hlôi tơlĕch păng mă blŭng đei jơnei kăp gĭt. Gah tơbôl kơ 2 Kuôk hô̆i, Kơdră Kuôk hô̆i ră hơdah lơ̆m tơdrong hơdrin hơtŏk "Lui ngeh chĭnh trĭ roi năr roi kơjung hloh", tơbôl jang hadoi đơ̆ng Kuôk hô̆i kơ 2 teh đak hơnơ̆ng đei hơtŏk kơjăp. Ƀok Kơdră jang tang măt pơtoi pơm gơng tơroh hơtŏk jang tôm tơdrong kơ 2 teh đak, tơgop jang tơnăp hơtŏk hlôh vao atŭm kơ Đe Kơdră kơpal; hơtŏk tơbôl kơ 2  Đảng, 2 teh đak hơnơ̆ng hơtŏk kơjăp, sơđơ̆ng, ‘lơ̆ng rŏ păng đunh đai tai sơnăm.