Kơdră Kuô̆k hô̆i pơma hơdăh, Việt Nam ling lang năng tơdrong pơm hơtŏk, pơih xă tơdrong pơvei hăm tĕh đak Nga ‘nŏh jĭ 1 lơ̆m dôm tơdrong tơgŭm tơm lơ̆m trong jang tơbôl. Việt Nam hơnơ̆ng chih răk tơdrong tơgŭm tih tên, đĭ jơhngâm đơ̆ng Liên Xô, đơ̆ng rŏng âu ‘nŏh jĭ tĕh đak Nga lơ̆m tơdrong iung tơblăh iŏk rơngei tĕh đak adrol sơ̆ kŭm nhen lơ̆m tơdrong jang tơiung, pơjing tĕh đak hrei ‘nâu.

Kuô̆k hô̆i Việt Nam hơnơ̆ng tơgŭm ăn Anih tơm sek tơlang kơ tĕh đak Việt Nam păng Anih tơm sek tơlang kơ tĕh đak Nga kŭm nhen dôm anih jang tư phap kơ 2 tĕh đak roi đunh roi mât mĭnh ƀơ̆r đon, jang hơdoi roi kơjăp ƀiơ̆. Kơdră chĕp kơ̆l Anih sek tơlang Lebedev Vyacheslav Mikhailovich lui, ‘măng năm hơpong mă âu gô tơgop pơm xă hlŏh dơ̆ng tơdrong pơvei, jang hơdoi hăm Anih tơm sek tơlang kơ tĕh đak Việt Nam; tơdrong pơgơ̆r ăn dôm khul grŭp tơƀâp, pơma nuh hăm băl hơnơ̆ng đei 2 tĕh đak pơgơ̆r tơ̆ hơnăp kơnh; atŭm hăm ‘nŏh athei pơgơ̆r ăn kon pơlei tơƀâp, pơma nuh hăm băl mă hơnơ̆ng ‘năi.