Kơdră Kuô̆k hô̆i Vương Đình Huệ pơma hơdăh, khei ‘năr âu ki 2 tĕh đak hlôi đei tơdrong pơvei chinh trĭ ‘lơ̆ng hơiă, mă hơdăh jĭ Khul kơdră tĕh đak, Kuô̆k hô̆i 2 tĕh đak hơnơ̆ng đei tơdrong pơvei jang hơdoi păng ăn khul jang tih tơƀâp, pơma nuh hăm băl. Kơdră Kuô̆k hô̆i hơmĕng, ‘măng năm hơpong đơ̆ng Phŏ Kơdră Hạ viện tĕh đak Séc tơgop pơm hơtŏk tơdrong pơvei jang hơdoi đơ̆ng Kuô̆k hô̆i/Nghị viện pơma hơdrô̆ păng tơdrong pơvei đơ̆ng 2 tĕh đak pơma atŭm.

Tơ̆ jơ pơma nuh, Kơdră Kuô̆k hô̆i Vương Đình Huệ păng Phŏ Kơdră Hạ viện tĕh đak Séc akhan, 2 tĕh đak ‘moi kiơ̆ tơdrong pơvei chinh trĭ, jang tơbôl ‘lơ̆ng gơ̆h pơm hơtŏk tôm tơdrong jang hơdoi nhen tĕch mơdro, tơmât jên jang. Việt Nam hơpơi ‘mĕh đei lơ tơmam đơ̆ng Việt Nam tĕch mơdro ăn tĕh đak Séc ‘moi kiơ̆ tơdrong Tơchơ̆t tĕch mơdro hiôk hian đơ̆ng Việt Nam - EU păng hơlơ̆k dơ̆ng, Việt Nam vă pơih ‘măng ăn dôm tơmam đơ̆ng tĕh đak Séc tĕch mât lơ̆m tĕh đak Việt Nam. Găh tĕh đak Séc ‘mĕh tĕch mơdro ‘nhĕm nhŭng, rơmo ăn Việt Nam lơ̆m khei ‘năr hrôih hlŏh.