Ƀar ƀok Kơdră chơt hơ-iă ƀôh tơdrong tơbôl jang hadoi 'lơ̆ng rŏ kơ 2 teh đak đei hơtŏk tơ-iung. Jang hadoi gah mŭk drăm hăm teh đak Thái Lan jing teh đak tĕch pơdro pran hloh kơ Việt Nam lơ̆m ASEAN păng jing anih asong jang tih mă 2 lơ̆m ASEAN. Sơnăm 2023, 2 teh đak tơbăt 10 sơnăm iung jang tơbôl, Kơdră Kuôk hô̆i pơkăl rim anih jang kơ 2 teh đak hơtŏk jang hadoi, hơtŏk tơlĕch pơm kiơ̆ “Pêng tơguăt”, đei hloi tơguăt asong jang; tơroh jang mŭk drăm, anih jang mŭk drăm păng tơringl tơguăt dôm tơdrong jang hơtŏk tơ-iung kơjăp, hơdring dah hrôih đei jơnei tơchơ̆t tĕch pơdro 2 păh truh 25 tih USD.

Kơdră Kuôk hô̆i pơkăl Kuôk hô̆i Thái Lan pơtoi pơm trong hiôk ăn kon pơlei Việt tơ̆ Thái Lan păng tơgŭm hơtŏk tơ-iung joh ayŏ Việt Nam tơ̆ Thái Lan vă pơm trong hơtŏk pran akŏm tơmang kơ kon pơlei 2 teh đak.