Iung pơma tơ̆ âu, Kơdră Kuôk hô̆i Vương Đình Huệ lăng ‘lơ̆ng, Anih jô̆ hơlen jên teh đak hlôi bơ̆jang ‘lơ̆ng dôm hơnăp jang đei pơjao kiơ̆ tơdrong hơgăt đơ̆ng khôi luơ̆t. Jang kiơ̆, pơvih pơvăn ‘lơ̆ng dôm hơnăp jang đơ̆ng Kuôk hô̆i, mă loi ‘noh jĭ tơdrong jang dăr hơlen dôm tơdrong jang tih kơ Kuôk hô̆i.

Sơnăm 2024, hơnăp jang tơlĕch ăn rim tơring, rim anih jang tôch kơ trăp trĭn, yua thoi noh Kơdră Kuôk hô̆i athei Khŭl vei lăng Anih jang Đảng păng tơpôl chĕp kơ̆l anih jang jô̆ hơlen jên hơnơ̆ng iung jang lơ̆m đĭ đăng anih jang, jơhngơ̆m pơjei iŏk jơnei ‘lơ̆ng hloh tơbăt 30 sơnăm pơjing anih jang. Anih jô̆ hơlen jên Teh đak băt hơdăh tơdrong jang đơ̆ng kuôk hô̆i, anih chĕp kơ̆l pơgơ̆r Kuôk hô̆i vă pơvih pơvăn roi ‘năr roi ‘lơ̆ng ăn Kuôk hô̆i lơ̆m tơdrong pơjing khôi luơ̆t, vă chă ƀôh dôm tơdrong ưh kơ ‘lơ̆ng, kơ kĕ tơ răn, hơdrom băl lơ̆m kơplăh jang kiơ̆ hơnăp jang.