Kơsơ̆ 6/8, tơ̆ anih tơm Jakarta, Kơdră Kuôk hô̆i Vương Đình Huệ păng dôm kơdră chĕp kơ̆l Kuôk hô̆i, Nghị viện dôm teh đak jang lơ̆m Jơnŭm jang hơdai Nghị viện dôm teh đak Đông Nam Á (AIPA) hlôi truh hop akŏm Khŭl chĕp kơ̆l pơgơ̆r AIPA. Tơ̆ jơ hop akŏm, Kơdră Kuôk hô̆k Vương Đình Huệ păng kơdră chĕp kơ̆l Nghị viện dôm teh đak hlôi pơma dơnuh păng pơ drơ̆ng kiơ̆ tơdrong jang đơ̆ng Hop akŏm AIPA - 44; tơdrong jang kăl Hop akŏm drŏ kăn nghị sỹ AIPA, Hop akŏm nghị sỹ mơlôh AIPA; jơ năr păng hơnih pơgơ̆r Hop akŏm AIPA – 45.

Hăm hơnăn tơm “Nghị viện kơchăng pơm lăp yua kơ 1 ASEAN sơđơ̆ng păng hơnŭk hơnoa”, Hop akŏm AIPA – 44 đei tơdrong tơklep păng lăp hăm hơnăn atŭm kơ ASEAN sơnăm ‘nâu ‘noh jĭ “Mĭnh ASEAN ‘lơ̆ng rŏ: Tơdrong tơm đơ̆ng jang tŏk”, lơ̆m noh hơtŏk ‘lơ̆ng tơdrong pơm lăp đơ̆ng dôm Nghị viện ASEAN lơ̆m tơdrong tơring păng apŭng plĕnh teh đei lơ tơplih, pơma hơdăh pơma dơnuh păng pơma tơgŭm, hơtŏk loi dơ̆ng jang hơdai đơ̆ng kênh pơjing khôi luơ̆t păng tơlĕch khôi luơ̆t, tơgop hơmet ming 1 jơhngơ̆m đon păng hơnăp jang tơm đơ̆ng ASEAN.