Hăm hơnăn tơm đơ̆ng Hop akŏm ‘noh jĭ: “Hơtŏk loi dơ̆ng hơnăp jang đơ̆ng Nghị viện lơ̆m tơdrong pơtrŭt jang hơdai tôm tơdrong đơ̆ng Campuchia, Lào, Việt Nam”. Tơchĕng hơdrol, khŭl tang măt Kuôk hô̆i Việt Nam gô đei dôm tơdrong jang tơ̆ hop akŏm nhen: Kơdră Kuôk hô̆i Vương Đình Huệ đei ƀai iung pơma gĭt kăl tơ̆ ‘măng hop akŏm đĭ đăng păng lêh pơtôch; dôm nơ̆r tơroi đơ̆ng Anih jang tơbôl, Mŭk drăm, Khŭl lĭnh păng vei sơđơ̆ng tơ̆ ‘măng hop akŏm dôm Anih jang; dôm nơ̆r pơma dơnuh đơ̆ng dôm Anih tơm ƀơm truh; tang măt dôm dêh char găh tơring Gơlang hơtŏk tơiung kơ Việt Nam nhen Kon Tum, Dak Lak, Dak Nông, Bình Phước, Gia Lai.

Hơdai hăm ‘noh, oei lơ nơ̆r tơgop vang akŏm đơ̆ng dôm bơngai tang măt Kuôk hô̆i, tang măt dôm anih tơm, anih jang vang truh ‘măng hop akŏm. ‘Năr 4/12, Kơdră Kuôk hô̆i Vương Đình Huệ hlôi pơma đam hăm Kơdră Kuôk hô̆i Saysomphone Phomvihane.