Tơƀôh găh dôm hơdra pơkao tŏk bŏk oei chôh ang rok 2 păh trong kơ pơlei Buôr, xăh Hòa Xuân, pơlei tơm Buôn Ma Thuột, yă H’Lép Niê dăh mă đe oei krao Mí Khiết ăn tơbăt, đei đăi trong pơkao âu, jơhngơ̆m akŏm lơ hloh nohphŏ ƀĭ thư chi ƀô̆, kơdră pơlei Ama Tháp:“Tơ̆ pơlei Buôr, xăh Hòa Xuân âu, lơ̆m dôm ‘măng akŏm hŏk hôp kon pơlei tơ̆ hnam hơkŭm, kơdră pơlei tơroi hăm kon pơlei, hăm rim bơngai, rim hnam băt ‘noh athei pơm ăn jăl trong mă rơgoh ‘lơ̆ng, pơtăm pơkao, ‘nhĕt, kơyuơ ‘noh kon pơlei tôch chơt hơ-iă. Inh ‘noh adoi bơngai oei tơ̆ pơlei âu, mơ̆ng kiơ̆ nơ̆r kơdră pơlei tơroi, inh adoi pơtăm pơkao pơguăng trong pơlei pơla”

Ưh hơdrô̆ hơvơn kon pơlei pơtăm pơkao pơguăng pơlei pơla, kơdră pơlei Ama Tháp oei yuk hơlâu lơ̆m tơdrong tơplih hơdrĕch ‘long pơtăm hăm trong, pơtăm hrâu tiu păng sâu riêng lơ̆m pơgar cheh phe. Đơ̆ng rŏng pơm jang đei jơnei, kơdră pơlei Ama Tháp hlôi hăt hot chă hơvơn kon pơlei jang kiơ̆ khua hŏk ki thuơ̆t lơ̆m choh pơtăm, rong kon tơrong păng vang jang kiơ̆ dôm tơdrong jang hơtŏk mŭk drăm. ‘Nhŏng hơnơ̆ng chă pơma dơnuh, hơvơn unh hnam hin dơnuh, unh hnam mă teh đak tơchơ̆t tơgŭm, unh hnam ưh đei ‘nhŏng oh vei lăng đei tơdrong hơrih tơnap tap... kiơ̆ đơ̆ng ‘noh đei lơ trong jang tơgŭm đe sư sơđơ̆ng tơdrong hơrih. ‘Nhŏng Y Sol Buôn Dáp, tơ̆ pơlei Buôr tơroi:“Tơ̆ pơlei âu Ama Tháp ‘noh kơdră pơlei, tơgŭm ăn kon pơlei chă pơm hla bơ-ar âu to, pơtho kon pơlei jang mir na ƀa pơtăm, pơm hla bơ-ar  tơ̆ Anih pơgơ̆r vei lăng kon pơlei xăh, tơgŭm ăn kon pơlei hơtŏk mŭk drăm, tơgŭm hơtŏk tơdrong hơrih ăn kon pơlei tơ̆ âu”

Hơdơ̆r dơ̆ng kơ khei năr đei jơnŭm pơgơ̆r tơring păng kon pơlei tơ̆ pơlei Buôr lui yom pôk jang phŏ kơdră pơlei, đang kơ ‘noh tŏk jang kơdră pơlei, ‘nhŏng Ama Tháp tơroi, ăh sơnăm 2011, lơ̆m pơlei đei minh ƀar bơngai đon kơnê̆ truh chă pơchŭt pơdôr, tơdui kon pơlei yak kiơ̆ trong glăi, kơdih po Ama Tháp adoi sơ̆l vơ̆l kơ đon. Đơ̆ng rŏng kơ băt hơdăh tơdrong trŏ, tơdrong yoch,  Ama Tháp atŭm hăm jơnŭm pơgơ̆r tơring truh rim unh hnam chă hơvơn, pơtho akhan ăn kon pơlei băt hơdăh. Gơnơm tơdrong dăp đon dăp bơnôh ‘noh mă Ama Tháp đei jơnŭm pơgơ̆r tơring păng kon pơlei lui yom pơjao ăn sơnong jang phŏ kơdră pơlei, đơ̆ng rŏng ‘noh tŏk jang kơdră pơlei, păng jang hloi phŏ ƀĭ thư chi ƀô̆ pơlei. Iŏk sơnong jang trăp trĭn thoi ăi, Ama Tháp kơchĕng athei hơdrin hloh, gô yuk trong hơlâu lơ̆m tôm tơdrong jang vă tơgăl hăm tơdrong lui yom ‘noh: “Inh tơroi kơ kon pơlei băt ‘noh inh athei tơmao kơdih po inh, nĕ chă mơ̆ng nơ̆r đe kơnê̆ tơdui pơhlŭ pơhlôm, jơnŭm pơgơ̆r tơring ưh đei chere oei sa hăm kon pơlei. Bơ̆n athei kơchĕng truh tơdrong hơrih po hơdrol đĭ đăng, đei tơdrong hơrih tơnăp, đei hnam oei kơjăp, jang sa hơtŏk tơ-iung, phĭ tơtŏ dơnŏ ‘lơ̆ng. Dang ei kon pơlei adoi băt hơdăh, teh đak asong jene man pơnơ̆ đak ăn kơ bơ̆n chă ruih ăn ‘long pơtăm, pơm trong nơnăm rơgoh ‘lơ̆ng, teh đak ưh đei prơih lê̆ kon pơlei po, ‘noh mih ma duch athei lui ngeh”

Tơchơ̆t găh sơnong jang phŏ ƀĭ thư chi ƀô̆, kơdră pơlei Buôr Ama Tháp, ƀok Nguyễn Đức Thuận, ƀĭ thư Anih jang Đảng xăh Hòa Xuân tơroi: “Ƀok Ama Tháp ‘noh sơnăm mơlôh, hơbĕch hơbal păng dăp đon dăp bơnôh hăm kon pơlei, sư đei lơ tơdrong jang tơplih ‘nao, mă kăl noh găh pơjing tơring tơrang ‘nao. Pơlei Buôr hơdroh ki adoi jing pơlei đei lơ tơsŭl tơsăl, mă lei dang ei đe hơdruh tơdăm rim sơnăm pơm kiơ̆ tơchơ̆t năm pơm linh, pơjao linh ‘noh hloh kơ pơkăp, đang kơ ‘noh pơm jang dôm tơdrong jang tơ̆ tơring adoi kơ-‘nôh đĭ jơhngơ̆m”

Dôm tơdrong mă ‘nhŏng Ama Tháp, phŏ ƀĭ thư chi ƀô̆, kơdră pơlei Buôr tơgop lơ̆m khei năr âu ki, ưh hơdrô̆ pơm tơplih tơdrong hơrih kon pơlei, mă oei hơtŏk đon lui đơ̆ng kon pơlei hăm Đảng, Teh đak; jing hơnih gơnơm kăp gĭt, jing “gơng tơroh” đơ̆ng dôm jăl jang kơpal hăm kon pơlei lơ̆m tơdrong pơjing anih jang chĭn trĭ, pơm trong ăn hơtŏk mŭk drăm – tơpôl tơ̆ tơring.