Ƀlep ƀât tơbăt 94 sơnăm năr pơjing Khul drŏ kăn Việt Nam păng Năr drŏ kăn Việt Nam (20/10), kơsơ̆ 15/10, tơ̆ Hnam Quốc hội, Kơdră Quốc hội Trần Thanh Mẫn pơgơ̆r tơƀâp đe drŏ kăn tang măt jang kơtă lơ̆m Quốc hội tơ̆ Trung ương, đe kăn ƀô̆ drŏ kăn jang lơ̆m Anih pơvih ăn Quốc hội, Anih tơchĕng hơlen, chih pơjing luơ̆t.

Pơma tơ̆ jơ tơƀâp, Kơdră Quốc hội Trần Thanh Mẫn pơma hơdăh tơdrong juăt kơtang nuih mơng đơ̆ng drŏ kăn Việt Nam vang tơgop tih lơ̆m tơdrong vei lăng, tơiung pơjing teh đak, đei Ƀok Hô hơpăh ăn dôm chư măih "Kơtang –Nuih mơng – Jơhngâm đon tơpăt ‘lơ̆ng – Jang tơnăp". Sơnăm 2025 jĭ sơnăm “jang tŏk” vă gơ̆h jang kĕh trong jang mŭk drăm, tơpôl 5 sơnăm; pơih trong vă jang đei jơnei tơdrong Tơchơ̆t ‘măng mă XIII kơ Đảng; hơmet ăn Hop akŏm Đảng jơ̆p tơring, năm truh Hop akŏm Đảng lơ̆m teh đak ‘măng mă XIV, Kơdră Quốc hội hơpơi ‘mĕh, đe drŏ kăn tang măt jang kơtă lơ̆m Quốc hội, đe drŏ kăn pơm yŏng, bơ̆ jang, pơvih pơvăn tơ̆ Anih pơvih ăn Quốc hội, Anih tơchĕng hơlen chih pơjing luơ̆t hơnơ̆ng tưk tơiung dôm tơdrong jang đei, adrin vang tơgop ‘lơ̆ng ăn tơdrong jang kơ Quốc hội.