Pơma tơ̆ jơ tơƀâp, Kơdră Quốc hội Vương Đình Huệ tơchĕng ‘lơ̆ng tơdrong pơchĕh đơ̆ng Khul jang kơ bơngai tang măt, grŭp ngĭ si drŏ kăn vang jang hơdoi pơgơ̆r lơ tơdrong ăn đe mo oh drŏ kăn. Kơdră Quốc hội pơma hơdăh, dôm jăl jang kơ Quốc hội păng đơ̆ng blŭng jăl jang Quốc hội mă 15 truh dang ei, Quốc hội hơnơ̆ng chă hơlen năng, tơplih ‘nao, jang đei lơ tơdrong tôch ‘lơ̆ng.

Lơ̆m noh, hơnơ̆ng đei hơnăp jang đơ̆ng đe drŏ kăn pơm Bơngai tang măt Quốc hội, đe mŏ oh lơ̆m dôm anih jang kơ Quốc hội. Mă loi, lơ̆m jăl jang kơ Quốc hội jăl 15 đei Bơngai tang măt jĭ drŏ kăn lơ hlŏh lơ̆m 10 jăl jang tơjê̆ âu, iŏk đei 30,26%, kơsô̆ âu đei nghị viện dôm teh đak tơchĕng ‘lơ̆ng. Kơdră Quốc hội lui, đe drŏ kăn pơm Bơngai tang măt Quốc hội gô hơnơ̆ng tưk tơiung dôm tơdrong jang đei, vang tơgop lơ hlŏh dơ̆ng lơ̆m tơdrong jang đơ̆ng Quốc hội, vang pơjing đei lơ tơdrong jơnei tih vă pơm pơ ‘lơ̆ng hlŏh dơ̆ng tơdrong juăt đơ̆ng sơ̆ păng năm truh ‘măng tơbăt 80 sơnăm Quốc hội Việt Nam.