Pơma tơ̆ jơ tơƀâp, Kơdră Quốc hội Vương Đình Huệ tơchĕng ‘lơ̆ng trong jang đơ̆ng dêh char Nghệ An kĭ tơchơ̆t pơjing Khul. Iŏk đơ̆ng đei pơjing sơnăm 2009, Khul linh kăch mang đei hơyăt rôp phak adrol sơ̆ kơ dêh char Nghệ An akŏm bơngai, hơmet kơjăp khul roi đunh roi pran. Hăm tơdrong juăt “Nhă đak ƀlŏk kơtu”, ling lang ƀlŏk truh dôm bơngai đei kŏng hăm kăch mang, Kơdră Quốc hội pơma hơdăh, Đảng, Tĕh đak bơnê păng tơrĕk truh dôm bơngai đei kŏng hăm kăch mang, lơ̆m nŏh đei đe linh kăch mang đei hơyăt rôp phak sơ̆. 

Tơ̆ hơnăp kơnh, Kơdră Quốc hội Vương Đình Huệ hơpơi ‘mĕh, dôm bơngai jang lơ̆m khul hơnơ̆ng chĕp vei kơjăp tơdrong juăt jang kăch mang tơpăt nuih mơng, ưh hli kiơ lơ̆m tơdrong tơblăh, pơnam, gơ̆h hơgei lơ̆m tơdrong jang xa; jang kiơ̆ mă ‘lơ̆ng dôm trong jang đơ̆ng Khul tơlĕch, hơnơ̆ng pơm hơtŏk tơdrong juăt jang kăch mang, hơmet kơjăp tơdrong pơvei hăm bôl boăl, vang tơgŭm băl pơjing tơdrong arih xa, tơgop ăn tơdrong pơjing păng vei lăng tĕh đak.