Pơgê 13/3, Kơdră Quốc hội Trần Thanh Mẫn, Kơdră chĕp kơ̆l Khul dăr hơlen kơsô̆ 1910 đơ̆ng Anih tơm Chĭnh trĭ bơ̆ jang hăm kơdră chĕp kơ̆l dêh char Bình Định roi tơbăt hla ar chih đơ̆ng hơlen năng hăm Khul kơdră chĕp kơ̆l đảng dêh char găh tơdrong hơmet ming khul bơngai jang tŏ sĕt bơngai, jang gơ̆h hơgei đei yoa păng tơdrong hơmet ăn Hop akom Đảng ƀô̆ jơ̆p tơring năm truh Hop akŏm bơngai tang măt lơ̆m teh đak ‘măng mă XIV kơ Đảng; Tơdrong jang vă atŏk tơiung mŭk drăm, tơpôl sơnăm 2025 hăm tơdrong tơm ‘nŏh jang tŏk đơ̆ng 8% tŏk tơ̆ kơpal...  

Đơ̆ng rŏng kơ mơ̆ng tơdrong chih tơroi mưh Dăr hơlen hăm Khul kơdră chĕp kơ̆l đảng dêh char Bình Định, lơ nơ̆r pơma đơ̆ng khul dăr hơlen, đơ̆ng kơdră chĕp kơ̆l dêh char Bình Định, pơma pơtôch jơ bơ̆jang, Kơdră Quốc hội Trần Thanh Mẫn ăn tơbăt, khul dăr hơlen hơnơ̆ng chih iŏk tôm nơ̆r pơma vă hơmet pơ ‘lơ̆ng Hla ar chih tơroi. Hăm đon pơhnŏng jang tŏk 8%, Kơdră Quốc hội tơchĕng ‘lơ̆ng dêh char Bình Định adrin jang đei păng tŏk lơ hlŏh kơsô̆ hơgăt. Kơdră Quốc hội tơtă, Bình Định athei ‘moi kiơ̆ trong jang đơ̆ng Đảng, khôi luơ̆t đơ̆ng teh đak mưh hơmet ming khul bơngai jang, bơ̆ jang ‘lơ̆ng tơdrong tơchơ̆t 35, tơdăh tơhlăk, apinh anih jang kơpal; atŭm hăm ‘nŏh hơnơ̆ng hơlen năng tơdrong tơroi đơ̆ng Anih tơm jang Nội vụ vă kơchăng tơlĕch bơ̆ jang; tơdrong pơgơ̆r jang mŭk drăm, tơpôl athei ‘moi kiơ̆ rim tơdrong lơ̆m apŭng plenh teh kŭm nhen lơ̆m teh đak vă lăp hăm rim tơdrong tơ̆ yăn âu.