Quân khu 9 pơm kơđông tơ̆ 12 dêh char, pơlei tơm Tơmăn đak krong Cửu Long, đei anih bơ̆jang gĭt kăl. Lơ̆m jơhnơr arih tơblăh iŏk rơngei, lĭnh păng kon pơlei Quân khu 9 hlôi đei lơ tơgop tih tên lơ̆m jơnei ang hơdăh kơ hơdrĕch hơdrŭng. Pơma tơ̆ jơ bơ̆jang, Kơdră Quốc hội Trần Thanh Mẫn tơtă, Quân khu 9 kăl kơ hơdrin vang jang tơgŭm Kon pơlei sut pơngot, tơjur dơnuh hin, pơjing tơring tơrang ‘nao, hơtŏk tơiung joh ayŏ - tơpôl; tang găn, hơmet ‘lơ̆ng hiong răm đơ̆ng sar bar, đak lơ̆p, jĭ hơbuh, tơchă dŏng tơgŭm, dŏng sar bar.

Jang hơdai hăm khŭl lĭnh Kŏng an, lĭnh vei lăng tơring sơlam, dôm anih jang kơ Anih tơm đei ƀơm truh păng khŭl kơdră tơring, khŏm iung jang tang găn pơm glăi, pơjing tơring sơđơ̆ng tơklep hăm anih jang sơđơ̆ng; kơchăng iung jang phă găn rim tơdrong tơchĕng vă pơm kơnê̆ đơ̆ng khŭl ayăt. Kơdră Quốc hội athei, Quân khu 9 hơnơ̆ng bơngơ̆t truh vei lăng ‘lơ̆ng tơdrong arih sa, tơmam drăm, jơhngơ̆m đon kơ kang ƀô̆, khŭl lĭnh. Jang kiơ̆ ‘lơ̆ng tơdrong jang tơgŭm khŭl lĭnh.